অসমীয়া অভিধান ‘হেমকোষ’ ৰ প্ৰণেতা, আধুনিক অসমীয়া গদ্যৰ বাটকটীয়া, ভাষাৰ ওজা হেমচন্দ্ৰ বৰুৱাৰ মৃত্যু দিৱস পালন । সেই উপলক্ষে গোলাঘাট জিলা সাংবাদিক সংস্থাৰ উদ্যোগত আৰু গোলাঘাট জাতীয় বিদ্যালয়ৰ শিক্ষক- শিক্ষয়িত্ৰী, ছাত্ৰ- ছাত্ৰীৰ সহযোগত গোলাঘাট জাতীয় বিদ্যালয়ৰ যোগেন পুণ্যপ্ৰভা প্ৰেক্ষাগৃহত অনুষ্ঠিত কৰা হয় এক বক্তৃতা অনুষ্ঠান। গাম্ভীৰ্যপূৰ্ণ এই অনুষ্ঠানত বিশিষ্ট নিৱন্ধকাৰ তথা গোলাঘাট জাতীয় বিদ্যালয়ৰ শৈক্ষিক ন্যাসৰ সভাপতি ডাঃ অজিত বৰুৱাই ছাত্ৰ- ছাত্ৰীসকলৰ উপকাৰ হোৱাকৈ সাৱলীল বক্তব্য আগবঢ়ায় ।
ভাষাৰ ওজা হেমচন্দ্ৰ বৰুৱাৰ প্ৰতিচ্ছবিত বন্তি প্ৰজ্বলন কৰে বিদ্যালয়খনৰ অধ্যক্ষা স্মৃতিৰেখা বৰা আৰু উপাধ্যক্ষা তথা শৈক্ষিক ন্যাসৰ সম্পাদক বনশ্ৰী কাকতিয়ে । এই অনুষ্ঠানত সংস্থাৰ সভাপতি ৰোহিত গগৈয়ে সভাপতিত্ব কৰে। সংস্থাৰ উপ সভাপতি অৰুণ বিকাশ বৰুৱাই আদৰণি ভাষণ আগবঢ়োৱাৰ লগতে সভাৰ আঁত ধৰে সাধাৰণ সম্পাদক গিৰীণ বৰাই। বিদ্যালয়খনৰ অষ্টম শ্ৰেণীৰ ছাত্র তথা জ্যেষ্ঠ সাংবাদিক দ্বীপমণি খাটনিয়াৰৰ পুত্ৰ বৰ্ণিল খাটনিয়াৰে ভাষাৰ ওজা হেমচন্দ্ৰ বৰুৱাৰ ওপৰত এক সুন্দৰ বক্তব্য আগবঢ়ায়।
সভাত শলাগৰ শৰাই আগবঢ়াই সংস্থাৰ উপ সভাপতি দ্বীপমণি খাটনিয়াৰে। ইয়াৰ পূৰ্বে গোলাঘাটৰ কলেজ তিনিআলিত অৱস্থিত ২০১৬ চনত সাদিন – প্ৰতিদিন গোষ্ঠীৰ স্বত্তাধিকাৰ জয়ন্ত বৰুৱাই স্থাপন কৰা ভাষাৰ ওজা হেমচন্দ্ৰ বৰুৱাৰ প্ৰতিমূৰ্ত্তিত বন্তি প্ৰজ্বলন আৰু মাল্যৰ্পন কাৰ্যসূচী সম্পন্ন কৰে বিশিষ্ট বোলছবি পৰিচালক, অৱসৰপ্ৰাপ্ত অধ্যাপক দীনেশ গগৈয়ে । এই অনুষ্ঠানত চমু বক্তব্য প্ৰদান কৰে অৱসৰপ্ৰাপ্ত জিলা তথ্য আৰু জনসংযোগ বিষয়া জীতেন কাকতি, উপ পৌৰপতি সীমান্ত বৰা আৰু সুনীল ৰাজগুৰুৱে।