বাংলাদেশত ডেংগু জ্বৰৰ ফলত মৃত্যু হোৱা লোকৰ সংখ্যা বৃদ্ধি পাবলৈ ধৰিছে। সোমবাৰে ১১ জন লোকৰ মৃত্যু হয়। ইয়াৰ লগে লগে এই বছৰ ডেংগুৰ ফলত মৃত্যু হোৱা লোকৰ সংখ্যা ১ হাজাৰ ১৭ জনলৈ বৃদ্ধি পায়। ইয়াৰ উপৰিও সোমবাৰে ২ হাজাৰ ৫৯৬ জন লোকক নতুনকৈ চিকিৎসালয়ত ভৰ্তি কৰা হৈছে। চলিত বৰ্ষৰ ১ জানুৱাৰীৰ পৰা ২ অক্টোবৰলৈ ২ লাখ আঠ হাজাৰ ৮৮৪ জন লোক ডেংগুত আক্ৰান্ত হৈছে। বিভিন্ন ব্যৱস্থা গ্ৰহণ কৰিও বাংলাদেশত ডেংগুৰ তাণ্ডৱ ৰোধ কৰিব পৰা নাযায়। বাংলাদেশত ডেংগু আতংকজনক মাত্ৰাত বৃদ্ধি পাইছে। সেই দেশৰ স্বাস্থ্য মন্ত্ৰালয়ে ডেংগুৰ পৰিস্থিতিৰ সৈতে মোকাবিলা কৰিবলৈ ২৯ কোটি ১৯ লাখ টকাৰ জৰুৰী পৰিস্থিতিৰ বাবে ২০ লাখ IV ফ্লুইড চেলাইন ক্ৰয় কৰিবলৈ অনুমোদন জনাইছে। কিছুদিন পূৰ্বে বিশ্ব বেংকে ডেংগু নিয়ন্ত্ৰণকে ধৰি চহৰ অঞ্চলত মৌলিক স্বাস্থ্য সেৱাৰ বিকাশৰ বাবে বাংলাদেশক ২০ কোটি ডলাৰৰ ঋণৰ অনুমোদন জনাইছিল। চলিত বৰ্ষৰ ৯ মাহত বাংলাদেশত ডেংগুৰ প্ৰাদুৰ্ভাৱে ক’ৰোনা মহামাৰীৰ কথা মনত পেলাই দিয়ে।
২০০০ চনত বাংলাদেশত প্ৰথমবাৰৰ বাবে ডেংগুৰ আবিৰ্ভাৱ হৈছিল। শিশুৱেই আটাইতকৈ বেছি ক্ষতিগ্ৰস্ত হৈছিল আৰু প্ৰাণ হেৰুৱাইছিল। কিন্তু বৰ্তমান ডেংগুৰ প্ৰাদুৰ্ভাৱ সকলো বয়সৰ লোকৰ মাজত দেখা গৈছে। ডেংগু এতিয়া কেৱল ঢাকাতে সীমাবদ্ধ নহয়, গ্ৰাম্য অঞ্চলতো ই বিয়পি পৰিছে। সেইবাবেই বাংলাদেশ চৰকাৰে ডেংগু ৰোগীক গ্ৰাম্য অঞ্চলৰ পৰা ঢাকালৈ স্থানান্তৰিত কৰাত নিষেধাজ্ঞা আৰোপ কৰিছে। ৰাষ্ট্ৰসংঘৰ এক প্ৰতিবেদন অনুসৰি ব্যক্তিগত খণ্ডত মৃত্যু হোৱা লোকৰ সংখ্যা চৰকাৰী গণনাতকৈ বেছি। কাৰণ, বহু ক্ষেত্ৰত ভুক্তভোগীক চিকিৎসালয়ত ভৰ্তি কৰা নহয়। গতিকে পৰিসংখ্যাৰ মাজত ডাঙৰ পাৰ্থক্য আছে। ইয়াৰ পূৰ্বে ২০২২ চনত ডেংগুত আক্ৰান্ত হৈ ২৮১ জন লোকৰ মৃত্যু হৈছিল। সেই বছৰৰ অন্তিম মাহত অৰ্থাৎ ডিচেম্বৰ মাহত ডেংগু ৰোগত আক্ৰান্ত হৈ ২৭ জন লোকৰ মৃত্যু হয়। একে সময়তে আলোচনা চলি থকা বছৰটোত ডেংগু সংক্ৰমণৰ বাবে ৬২ হাজাৰ ৩৮২ জন লোকক চিকিৎসালয়ত ভৰ্তি কৰা হৈছিল।২০২০ চনত কৰ’না মহামাৰীৰ সময়ত ডেংগু সংক্ৰমণ বিশেষভাৱে দেখা পোৱা নাছিল যদিও ২০২১ চনত বাংলাদেশত ২৮ হাজাৰ ৪২৯ জন লোক ডেংগুত আক্ৰান্ত হৈছিল। একে বছৰতে বাংলাদেশত ডেংগু ৰোগত আক্ৰান্ত হৈ ১০৫ জন লোকৰ মৃত্যু হয়।