লক্ষীগঞ্জ : চলিত মাহত চাৰিটা কৈ বানপানীয়ে জোঁকাৰি যোৱা বিলাসীপাৰা মহকুমাৰ নায়েৰ আলগা ৪ৰ্থ খণ্ড গাঁৱত বুধবাৰে নিশা সংঘটিত হয় এক ভয়াবহ অগ্নিকাণ্ডৰ। বিধ্বংসী অগ্নিকাণ্ডত গাঁওখনৰ পাঁচটা পৰিয়ালৰ প্ৰায় ১৫ টাকৈ বাসগৃহ জুইত জাহ যায়। গাঁওখনৰ বাসিন্দা কলিমুদ্দিন সেখৰ ঘৰৰ পৰা জুইৰ সুত্ৰপাত হয়। লোকজনৰ ঘৰৰ পৰা সুত্ৰপাত হোৱা জুয়ে নিমিষতে ভয়াৱহ ৰূপ ধাৰণ ১৫ টাকৈ বাসগৃহ পুৰি ছাইত পৰিণত কৰি পেলায়। বান বিধ্বস্ত অঞ্চলটোৰ পথ ঘাট জহি খহি যোৱাত গাঁওখনত উপস্থিত হ’ব পৰা নাই অগ্নি নিৰ্বাপক বাহিনী। পৰবৰ্তী সময়ত স্থানীয় ৰাইজৰ তৎপৰতাৰে জুই নিৰ্বাপিত কৰাত কথমপি ৰক্ষা পৰে চুবুৰীয়াৰ অন্যান্য পৰিয়ালৰ বাসগৃহ। এই অগ্নিকাণ্ডত পৰিয়াল কেইটাৰ গুৰুত্বপূৰ্ণ নথি পত্ৰ, ধান, মৰাপাট, সৰিয়হকে ধৰি প্ৰায় ত্ৰিশ লক্ষাধিক টকাৰ সা সম্পত্তি ভষ্মীভুত হয় বুলি জানিব পৰা গৈছে।
