নাজিৰা : “মুখ্যমন্ত্ৰী মহোদয়ে খাদ্য আৰু যোগান বিভাগৰ মন্ত্ৰী আৰু বিষয়া কৰ্মচাৰী সকলৰ লগত লকডাউনৰ সময়ত যাতে খাদ্য সামগ্ৰীৰ অভাৱ নহয় তাৰেই সন্দৰ্ভত এখন বৈঠকত মিলিত হোৱা বুলি খবৰ পাইছিলো। কিন্তু আমি যোৱা ৩ মহীয়া লকডাউনৰ সময়ত সকলোৱে দেখিছিলো কেনেকৈ খাদ্য আৰু যোগান বিভাগে জনসাধাৰণক লাগতীয়াল খাদ্য-সামগ্ৰী বিতৰণ কৰাত ব্যৰ্থ হৈছিল। গতিকে মোৰ অনুৰোধ যেন, এইবাৰৰ যি ১৪ দিনীয়া লকডাউন অসম চৰকাৰে ঘোষণা কৰিছে, এই সময়ছোৱাত যেন জনসাধাৰণ খাদ্য সামগ্ৰীৰ অভাৱত ভুগিবলগীয়া নহয়।” অসম চৰকাৰক এইদৰে আহ্বান জনাই অসম বিধান সভাৰ বিৰোধী দলপতি দেৱব্ৰত শইকীয়াই লগতে কয় যে, ৰাজ্যৰ স্বাস্থ্য মন্ত্ৰী ডাঙৰীয়াই ৰবিবাৰ মধ্যৰাত্ৰীৰ পৰা সমগ্ৰ গুৱাহাটী তথা কামৰূপ মেত্ৰ’ত ১৪ দিনৰ বাবে লকডাউন ঘোষণা কৰাৰ পিছতে খুচুৰা বিক্ৰেতা সকলে খাদ্য সামগ্ৰী সমূহৰ মূল্য অস্বাভাৱিক হাৰত বৃদ্ধি কৰিছে। যাৰ ফলত গুৱাহাটীবাসী ৰাইজ এক জটিল পৰিস্থিতিৰ সন্মুখীন হ’বলগীয়া হৈছে। উদাহৰণস্বৰূপে আলুৰ দাম আছিল ৩০ টকা কিন্তু এতিয়া আলুৰ দাম ৫০ টকা পৰ্যন্ত মূল্য বৃদ্ধি হৈছে। ঠিক একেদৰে মাছ-মাংস, শাক-পাচলি, ফল-মূল আদি সকলো বস্তুৰে মূল্য স্বাভাৱিক মূল্যতকৈ অত্যাধিক হাৰত বৃদ্ধি হৈছে। সেয়েহে বিভাগীয় মন্ত্ৰী মাননীয় ফণিভূষণ চৌধুৰীক ইয়াৰ ওপৰত নাকি লগাই অসাধু বেপাৰী সকলৰ ওপৰত যেন কঠোৰ পদক্ষেপ গ্ৰহণ কৰে তাৰ বাবে অনুৰোধ জনাই বিৰোধী দলপতি গৰাকীয়ে লগতে কয়, যিহেতু গুৱাহাটী অহা ১৪ দিনলৈ বন্ধ থাকিব গতিকে গুৱাহাটীৰ পৰা গাঁও অঞ্চললৈ ৰপ্তানি হোৱা খাদ্য সামগ্ৰীসমূহ যাতে সময়মতে পঠিয়াব পাৰে তাৰ ওপৰতো বিশেষ নজৰ দিয়ক। নহ’লে অসমৰ বিভিন্ন প্ৰান্তত ইতিমধ্যে অহা বানপানী আৰু লকডাউনৰ সুযোগ লৈ বিভিন্ন অসাধু বেপাৰীয়ে ৰাইজক লুটাৰ পৰিকল্পনা কৰিব বুলি বিৰোধী দলপতি দেৱব্ৰত শইকীয়াই অসম চৰকাৰক আহ্বান জনাইছে।
