দলগাও পৰা আবুল হাছেম ঃ
মধ্যাহ্ন ভোজনৰ সামগ্ৰী বিতৰণক লৈ প্ৰধান শিক্ষকক প্ৰাণে মাৰাৰ ভাবুকি দিয়া ঘটনাই তীব্ৰ চাঞ্চল্যৰ সৃষ্টি কৰিছে দৰঙৰ খাৰুপেটীয়াত। এই ঘটনা সংঘটিত হৈছে জিলাখনৰ দলগাও শিয়ালমাৰী শিক্ষা খণ্ডৰ অন্তৰ্গত ২নং মাগুৰমাৰী প্ৰাথমিক বিদ্যালয়ত। জানিব পৰা মতে ছাত্র ছাত্ৰীক মধ্যাহ্ন ভোজনৰ সামগ্ৰী বিতৰণ কৰাৰ মুহূৰ্তত প্ৰাক্তন সভাপতি ফকীৰ আলীয়ে অনাধিকাৰে বিদ্যালয়ত প্ৰৱেশ কৰি অযথা গালি গালাজ পাৰে ।বিদ্যালয়ৰ পৰিচালনা সমিতিৰ সভাপতি হব নোৱাৰাৰ বাবেই মানসিক হাৰাশাস্তি কৰি থকা বুলি অভিযোগ উত্থাপিত হৈছে।প্ৰাক্তন সভাপতি ফকিৰ আলীৰ কাৰ্য্যকালত বিদ্যালয় খনত ব্যাপক অনিয়ম সংঘটিত হোৱাত স্থানীয় ৰাইজে সাধাৰণ সভাৰ জড়িয়তে আন এজন ব্যক্তিক পৰিচালনা সমিতিৰ সভাপতি হিচাপে নিৰ্বাচিত কৰে। প্ৰধান শিক্ষকৰ লগতে পৰিচালনা সমিতিৰ একাংশ সদস্যক দীৰ্ঘদিন ধৰি বিভিন্ন ধৰণৰ ভয় ভাবুকি দি আহিছিল ফকীৰ আলীয়ে। প্ৰাক্তন সভাপতিৰ বিৰূদ্ধে ধুলা আৰক্ষী থানাত এজাহাৰ দাখিল কৰে প্ৰধান শিক্ষকৰ লগতে বিদ্যালয়ৰ পৰিচালনা সমিতিয়ে। আনহাতে প্ৰাক্তন সভাপতি ফকীৰ আলীক গ্ৰেপ্তাৰ কৰাৰ দাবী জনাইছে বিদ্যালয়ৰ পৰিচালনা সমিতিৰ একাংশ সদস্যই।