ডিৰাক সীমান্ত
তিনিচুকীয়া জিলাৰ কাকপথাৰ আৰু ধলা অঞ্চলৰ শতাধিক গাঁৱৰ ৰাইজৰ বাবে ভাবুকি স্বৰূপ হৈ পৰা ন-দিহিং নদীৰ ডিৰাক চোমনি মথাউৰিৰ সংকটপূৰ্ণ হৈ থকা চাৰিটা অংশৰ খহনীয়া ৰোধৰ বাবে অসম চৰকাৰে প্ৰায় চাৰি কোটি বিৰাশী লাখ টকাৰ জিঅ’ বেগৰ আঁচনি প্ৰস্তুত কৰি প্ৰণৱজ্যোতি চেতিয়া নামৰ ঠিকাদাৰগৰাকীক কামৰ আৱণ্টন দিছিল যদিও কামৰ লেহেমীয়া গতিৰ বাবে ক্ষুণ্ণ হৈ পৰিছে সমষ্টিটোৰ বিধায়ক বলিন চেতিয়া৷ শুকুৰবাৰে বিধায়কগৰাকীয়ে ডিৰাক চোমনি মথাউৰিত উপস্থিত হৈ কামৰ অগ্ৰগতি দেখি তীব্ৰ অসন্তুষ্টি ব্যক্ত কৰে। ঠিকাদাৰৰ মহৰিৰ লগতে জলসম্পদ বিভাগৰ কৰ্মচাৰীক অধিক ক্ষিপ্ৰতাৰে জিঅ’ বেগৰ কাম সম্পূৰ্ণ কৰিবলৈ নিৰ্দেশ দিয়াৰ লগতে আগন্তুক কেইদিনমানৰ পিছতে কামৰ অগ্ৰগতিৰ বুজ ল’বলৈ পুনৰ মথাউৰি পৰিদৰ্শন কৰিব বুলি জনায়৷ আনহাতে মথাউৰি মেৰামতি কৰা কামত দুৰ্নীতি হোৱাৰ অভিযোগ উত্থাপন হোৱাৰ উপৰি একাংশই কামত বিধিপথালি দিয়াৰ অভিযোগ সন্দৰ্ভত বিধায়কগৰাকীয়ে মথাউৰি জিঅ’ বেগৰ চাৰিটা অংশৰ কামত কোনোধৰণৰ দুৰ্নীতি সহ্য কৰা নহ’ব বুলি প্ৰকাশ কৰি কামত বিধিপথালি দিয়া ব্যক্তিৰ ওপৰত প্ৰয়োজন সাপেক্ষে আইনগত ব্যৱস্থা গ্ৰহণ কৰা হ’ব বুলি সকীয়াই দিয়ে৷ উল্লেখ্য যে বাৰিষা সমাগত হ’ল যদিও বৰ্তমানলৈকে মথাউৰিৰ মেৰামতিৰ কাম বৰ্তমানলৈকে প্ৰায় চল্লিশ শতাংশহে সম্পন্ন হৈছে৷