সাপৰ মাছাজ
এইখন বিচিত্র পৃথিৱীত প্রতিনিয়ত কিমান যে বিচিত্র ঘটনা নঘটে । বিজ্ঞান – প্রযুক্তিৰ চমকপ্রদ সাফল্যৰ জৰিয়তে সভ্যতাৰ শীর্ষ স্তৰত উপনীত হােৱা মানুহৰ জীৱন শৈলীৰাে দ্রুত সলনি হ’বলৈ ধৰিছে । প্রত্যেক মানুহে এই ব্যস্ততাপূর্ণ জীৱনৰ ক্লান্তি আঁতৰাবলৈ কিছু বিৰামৰ প্রয়ােজন আহি পৰে । কর্মব্যস্ততাৰ লগে লগে বিলাসী জীৱন শৈলীৰ সৈতে অভ্যস্ত হৈ পৰা একাংশ লােকৰ প্রাত্যহিক জীৱনৰ অৱসাদ দূৰ কৰি জীৱনটোক পুনৰুজ্জীৱিত , উপভােগ্য কৰি তুলিবলৈ সর্বোৎকৃষ্ট আহিলা যােগানৰ বাবে এতিয়া ব্যস্ত হৈ পৰিছে বিভিন্ন কোম্পানী। আধুনিক যুগত শৰীৰৰ ক্লান্তি আঁতৰােৱাৰ এক উত্তম পন্থাৰূপে সমাদৃত হৈছে মাছাজ । ছিংগাপুৰ , হংকং , থাইলেণ্ড , চীন , জাপান আদি দেশত বিভিন্ন তৰহৰ মাছাজৰ ব্যৱস্থা আছে । শেহতীয়াকৈ চীনে মাছাজৰ এক নতুন কৌশল উদ্ভাৱন কৰিছে । তেওঁলােকে মাছজৰ সৈতে সংযােগ কৰিছে এক শিহৰণকাৰী , ৰােমাঞ্চকৰ উপাদান । সেয়া হ’ল বিষহীন বৃহৎ আকাৰৰ সাপৰ দ্বাৰা মাছজ দিয়াৰ ব্যৱস্থা কৰিছে । সাপ শীতলৰক্তি ছােৱা হেতুকে ইয়াৰ স্পৰ্শই মানুহৰ দেহ জুৰ পেলোৱাৰ লগতে নতুন উদ্যম আনি দিয়ে।
যৌতুকত সাপ
কন্যাৰ বিবাহৰ বাবে পিতৃ – মাতৃয়ে কিমান কি যে সপােন পুহি নাৰাখে । সাধাৰণতে কন্যাৰ বিবাহত পিতৃ – মাতৃয়ে সােণ – ৰূপ আদিকে ধৰি ঘৰুৱা নিত্যপ্রয়ােজনীয় সা – সামগ্রী যৌতুক হিচাপে দিয়ে । পিছে আপুনি কেতিয়াবা শুনিছেনে কন্যাৰ বিবাহত বিষাক্ত সাপ যৌতুক হিচাপে দিয়াৰ কথা ? মধ্যপ্রদেশৰ গৌৰীয়া সম্প্রদায়ৰ মাজত এনে এক শিহৰণকাৰী ৰীতি প্রচলিত আছে পিতৃ – পুৰুষানুক্রমে চলি অহা এই ৰীতি অনুসৰি কন্যাৰ বিবাহত এই সম্প্রদায়ৰ লােকে ২১ ডাল বিষাক্ত সাপ যৌতুক দিয়ে । যৌতুকত সাপ দিয়াটো তেওঁলােকৰ সমাজৰ বাবে এক মর্যাদাসূচক কথা । যৌতুকত কন্যাৰ সৈতে এই সাপ দিয়াৰ অন্তৰালত আন এক বিষয় জড়িত আছে । সেয়া হ’ল জীৱিকাৰ উপায় । কন্যাৰ সৈতে সাপকেইটা এইকাৰণে দিয়ে , যাতে জোঁৱায়েকে এই সাপকেইটাৰ জৰিয়তে পৰিয়ালক ভৰণ – পােষণ দিব পাৰে । আনহাতে বিয়াত পিতৃয়ে কন্যাৰ সৈতে সাপ নিদিলে উক্ত বিয়াখন ক্ষণস্থায়ী হয় বুলিও সম্প্রদায়টোৰ লােকৰ মাজত এক লােকবিশ্বাস প্রচলতি আছে।