কষ্ট কৰাৰ প্ৰয়োজন নাই! যদি আপুনি ওজন কমাব বিচাৰে তেন্তে ৰাতি শোৱাৰ পূৰ্বে কৰক এই সমূহ কাম…

মেদবহুলতা বৰ্তমান সময়ত এক সাধাৰণ সমস্যাত পৰিণত হৈছে। ভুল খাদ্যাভ্যাস, অস্বাস্থ্যকৰ জীৱনশৈলী আৰু ব্যায়ামৰ অভাৱৰ বাবে মেদবহুলতা অতি দ্ৰুতগতিত বৃদ্ধি পায়। মেদবহুলতা দেখাত বেয়াই নহয়, বহুতো গুৰুতৰ ৰোগো সৃষ্টি কৰিব পাৰে। মেদবহুলতাৰ বাবে ডায়েবেটিছ, উচ্চ ৰক্তচাপ, কলেষ্টেৰল আৰু হৃদযন্ত্ৰৰ লগত জড়িত ৰোগৰ সম্ভাৱনা বৃদ্ধি পাব পাৰে। বৰ্ধিত ওজন নিয়ন্ত্ৰণ কৰিবলৈ মানুহে ডায়েট কৰে। কিন্তু বহু সময়ত কষ্ট কৰিলেও ওজন কমি নাযায়। এনে পৰিস্থিতিত খাদ্য আৰু জীৱনশৈলীত কিছু পৰিৱৰ্তন কৰি সহজেই ওজন কমাব পাৰি।

ওজন কমাব বিচাৰিলে সন্ধিয়া ৭ বজাৰ পিছত ৰাতিৰ আহাৰ নাখাব। ৰাতিৰ আহাৰ আৰু শোৱাৰ মাজত প্ৰায় ৩ ঘণ্টাৰ ব্যৱধান থাকিব লাগে। গভীৰ নিশা খাদ্য খালে খাদ্য সঠিকভাৱে হজম নহয়। ই আপোনাৰ বিপাকীয় ক্ৰিয়াতো প্ৰভাৱ পেলায়, যাৰ বাবে শৰীৰত চৰ্বি জমা হ’বলৈ আৰম্ভ কৰে। গতিকে যদি আপুনি ওজন কমাব বিচাৰে তেন্তে সন্ধিয়া সোনকালে ৰাতিৰ আহাৰ গ্ৰহণ কৰক।

ৰাতি সদায় কম আহাৰ খাব লাগে। ওজন কমাবলৈ ৰাতিৰ আহাৰত প্ৰটিন আৰু আঁহযুক্ত বস্তু অন্তৰ্ভুক্ত কৰিব লাগে। ৰাতি সেউজীয়া শাক-পাচলি, চূপ, চালাড আৰু দালি খাব পাৰে। গভীৰ নিশা যদি ভোক লাগে তেন্তে তিয়হ বা আপেল এটা খাব পাৰে।

এটা গৱেষণাই প্ৰমাণ কৰিছে যে আমি যেতিয়া শুই যাও তেতিয়া মেলাটনিন হৰম’নে আমাৰ শৰীৰত ব্ৰাউন ফেট সৃষ্টি কৰে, যিয়ে কেলৰি জ্বলোৱাত সহায় কৰে। আন্ধাৰত শুলে শৰীৰত অধিক মেলাটনিন উৎপন্ন হয়, যিয়ে দ্ৰুত ওজন হ্ৰাস কৰাত সহায় কৰিব পাৰে। সেয়েহে ৰাতি সদায় আন্ধাৰ কোঠাত শুব লাগে। লগতে শোৱাৰ পূৰ্বে মোবাইল বা ইলেক্ট্ৰনিক গেজেট ব্যৱহাৰ নকৰিব।

হালধি গাখীৰেও ওজন কমাবলৈ আৰু ভাল টোপনিত সহায় কৰে। আচলতে হালধিত থাৰ্মোজেনিক গুণ আছে, যিয়ে চৰ্বি কম কৰাত সহায় কৰে। ইয়াৰ উপৰিও ই বিপাকীয় ক্ৰিয়াকো সহায় কৰে। সেয়ে প্ৰতি নিশা শোৱাৰ পূৰ্বে এগিলাচ হালধিৰ গাখীৰ খাব লাগে।

মেদবহুলতা টোপনিৰ লগতো প্ৰত্যক্ষ সম্পৰ্ক আছে। ওজন কমাবলৈ কমেও ৭ ঘণ্টা ভাল, গভীৰ আৰু শান্তিপূৰ্ণ টোপনি যোৱাটো গুৰুত্বপূৰ্ণ। যদি আপুনি পৰ্যাপ্ত পৰিমাণে টোপনি নাপায় তেন্তে আপোনাৰ বিপাকীয় ক্ৰিয়া লেহেমীয়া হ’ব, যাৰ ফলত ওজন কমাবলৈ অসুবিধা হ’ব।