অসম কবি সন্মিলনৰ যোৰহাট জিলা কবি সন্মিলনৰ ত্ৰয়োদশ দ্বি-বাৰ্ষিক পূৰ্ণাঙ্গ অধিৱেশনখন যোৱা ২৭ ডিচেম্বৰত দিনজোৰা কাৰ্যসূচীৰে টীয়কত অনুষ্ঠিত হৈ যায়। টীয়ক শাখা কবি সন্মিলনৰ আতিথ্যত টীয়ক ব্ৰাহ্মণ গাওঁস্থিত শঙ্কৰজ্যোতি কলা-কৃষ্টি কেন্দ্ৰত আয়োজিত অধিবেশনৰ পুৱা পতাকা উত্তোলন কৰে আদৰণি সমিতিৰ সভাপতি ৰমেন শৰ্মাই। টীয়ক শাখা কবি সন্মিলনৰ সভাপতি ৰঞ্জন বৰাই স্মৃতি তৰ্পণ কৰা অনুষ্ঠানত বৃক্ষ ৰোপন কৰে স্বেচ্ছাসেৱী সংগঠন ‘ৰেঙণিঃএটি আশা’ৰ সঞ্চালক বিজু শৰ্মাই। পুৱা ১০ বজাৰ পৰা কবি অনুভৱ সাগৰৰ সঞ্চালনাত অনুষ্ঠিত হোৱা সু-কবি শৰৎ চন্দ্ৰ দত্ত সোঁৱৰণী শিশু আৰু কিশোৰৰ অনুষ্ঠান ‘কাব্যমুকুল” উদ্ধোধন কৰে বিশিষ্ট শিশু-সাহিত্যিক তথা যোৰহাট জিলা কবি সন্মিলনৰ প্ৰাক্তন উপ-সভাপতি দেবেন চন্দ্ৰ বৰাই। বিমান শইকীয়া আৰু ভাগ্যশ্ৰী তামুলীয়ে আঁতধৰা অনুষ্ঠান টোত সমল ব্যক্তিৰূপে ভাগ লয় বিশিষ্ট শিশু সাহিত্যিক অনন্ত কুমাৰ শৰ্মাই । অনুষ্ঠানটিত অঞ্চলটোৰ প্ৰায় দুকৰি শিশু-কিশোৰে কবিতা আবৃত্তি, কবিতা পাঠ, গীত-মাত আদি পৰিবেশন কৰে। দুপৰীয়া ১২বজাৰ পৰা জিলা সমিতিৰ ২০১৮-২০ বৰ্ষৰ অন্তিমখন কাৰ্যনিৰ্বাহক অনুষ্ঠিত হয়।প্ৰতিনিধি সভাই ২০২০-২২ বৰ্ষৰ বাবে বিশিষ্ট কবি, গীতিকাৰ অজিত কুমাৰ বৰদলৈক সভাপতি আৰু চৈয়দ পাৰভিজ হুচেইনক যোৰহাট জিলা কবি সন্মিলনৰ সম্পাদক নিৰ্বাচিত কৰে। আনহাতে বিয়লি প্ৰায় ৩বজাৰ পৰা যোৰহাট জিলা কবি সন্মিলনৰ প্ৰাক্তন সভাপতি হেমচন্দ্ৰ গগৈৰ সভাপতিত্বত অধিবেশনৰ ‘মুকলি সভা আৰু বঁটা-সন্মান প্ৰদান অনুষ্ঠান’ অনুষ্ঠিত হয়। সদৌ অসম কবি সন্মিলনৰ প্ৰাক্তন সভাপতি ড° মানিক শইকীয়াই উদ্বোধন আৰু জিলা কবি সন্মিলনৰ সম্পাদক বাবলু প্ৰসাদ বৰুৱাই আঁতধৰা মুকলি সভাখনিত সদৌ অসম কবি সন্মিলনৰ সভাপতি প্ৰদীপ শইকীয়া মুখ্য অতিথি, প্ৰধান সম্পাদক উজ্জ্বল পাওগাম আৰু প্ৰাক্তন প্ৰধান সম্পাদক পৰাগজ্যোতি মহন্তই সন্মানীয় অতিথি, যোৰহাট জিলা কবি সন্মিলনৰ প্ৰাক্তন সভাপতি যোগমায়া গগৈ, অসম লেখিকা সংস্থাৰ কাৰ্যকৰী সভানেত্ৰী মামনি গগৈ বৰুৱা, সমাজসেৱিকা পল্লৱী শইকীয়া গগৈয়ে বিশিষ্ট অতিথি হিচাপে অংশগ্ৰহণ কৰে। এই অধিৱেশনৰ লগতে সংগতি ৰাখি টীয়ক শাখা কবি সন্মিলনে প্ৰকাশ কৰা আৰু দিগন্ত চাংমায়ে সম্পাদনা কৰা ‘টীয়ক টীয়ক’ নামৰ মুখপত্ৰখনি উন্মোচন কৰে সদৌ অসম কবি সন্মিলনৰ প্ৰধান সম্পাদক উজ্জ্বল পাওগামে। দিগন্ত চাংমাইৰ সম্পাদিত ‘টীয়ক টীয়ক’ৰ লগতে অধিৱেশনখনিত টুনমনি বৰদলৈ সম্পাদিত যোৰহাট জিলা কবি সন্মিলনৰ মুখপত্ৰ ‘গাণ্ডীৱ’, কবিতাৰ সংগঠক দুলাল বৰাৰ ‘ৰাজপথৰ কবিতা’ নামৰ এখন এটকীয়া আলোচনীকে ধৰি কেইবাখনো কবিতা-গল্প আৰু সাধুকথাৰ পুথি উন্মোচন কৰা হয়। মুকলি সভাখনিতে নৰেন্দ্ৰ নাথ দত্তক ২০২০বৰ্ষৰ ‘গাণ্ডীৱ বঁটা’, প্ৰদীপ গগৈক ‘কাব্যসৌৰভ’ উপাধি, পূৰ্ণিমা শৰ্মা আৰু পূণ্য দেৱীক ‘কাব্যপ্ৰভা’ উপাধি, কবি প্ৰাঞ্জল কুমাৰ লাহনক ‘ভোগদৈপাৰৰ শ্ৰেষ্ঠ কবি-২০২০’ বঁটা, ৰাতুল কুমাৰ ভূঞা আৰু দেৱজিৎ গোস্বামীক শ্ৰেষ্ঠ সংগঠক বঁটা আৰু তিতাবৰ শাখা কবি সন্মিলনলৈ শ্ৰেষ্ঠ শাখাৰ বঁটা প্ৰদান কৰা হয়। বিয়লি প্ৰায় ৬বজাৰ পৰা বিশিষ্ট কবি, গল্পকাৰ ডাঃ মাখন কলিতাৰ সঞ্চালনাত ভাষাতাত্বিক ড° বেণু গগৈ সোঁৱৰণী কবিতা পাঠৰ অনুষ্ঠান ‘কাব্যসন্ধি’ সম্পন্ন হয়। সু-চিকিৎসক, কবি ডাঃ প্ৰাঞ্জলজ্যোতি দত্তই উদ্বোধন আৰু কবি, গীতিকাৰ অজিত কুমাৰ বৰদলৈয়ে বিশিষ্ট অতিথি হিচাপে অংশগ্ৰহণ কৰা ‘কাব্যসন্ধি’ অনুষ্ঠানটি কবি দেৱজিত হাজৰিকা, শিখা ভূঞা হাজৰিকা, বিমান শইকীয়া, ভাগ্যশ্ৰী তামুলী, বিভাৰাণী শইকীয়াকে ধৰি বহুকেইগৰাকী কবিয়ে স্ব-ৰচিত কবিতা পাঠেৰে জীপাল কৰি তোলে।
