অসম আৰু পশ্চিম বংগ ৰাজ্যৰ কোঁচ ৰাজবংশী জনগোষ্ঠীটোৰ ঐতিহাসিক কমতাপুৰ ৰাজ্যৰ পুনৰ গঠন আৰু জনজাতিকৰণৰ দাবীত আজি কোঁচ ৰাজবংশী জাতীয় পৰিষদৰ কেন্দ্ৰীয় সমিতিয়ে নামনি অসমৰ বঙাইগাঁও জিলাসদৰ চহৰখনৰ মাজমজিয়াত থকা বৰপাৰা ৰাজহুৱা খেলপথাৰত তিনি ঘন্টাৰ অৱস্থান ধৰ্মঘট আন্দোলন পালন কৰি পৰিস্থিতি উত্তাল কৰি তোলে । প্রাপ্ত বাতৰিমতে আজি ৰাতিপুৱা ১১.০০বজাত বঙাইগাঁও বৰপাৰা ৰাজহুৱা খেলপথাৰত কোঁচ ৰাজবংশী জনগোষ্ঠীৰ জাতীয় সংগঠন কোঁচ ৰাজবংশী জাতীয় পৰিষদ আৰু সংগঠনটোৰ মহিলা পৰিষদৰ লগতে সুভাকাংক্ষী বিভিন্ন দল সংগঠনৰ নেতৃবৃন্দৰ প্ৰায় পাঁচ শতাধিক নেতা সদস্যসকলে উপস্থিত হৈ অৱস্থান ধৰ্মঘট আন্দোলন পালন কৰে আৰু বিভিন্ন চৰকাৰ বিৰোধী ধ্বনি দি পৰিস্থিতি উত্তাল কৰি তোলে আৰু তিনি ঘণ্টাৰ অৱস্থান ধৰ্মঘট ৰ অন্তত বঙাইগাঁও জিলা উপায়ুক্ত বিষয়া ৰ জৰিয়তে ভাৰতৰ প্ৰধানমন্ত্ৰী নৰেন্দ্ৰ মোদী আৰু অসমৰ মুখ্যমন্ত্ৰী ডঃ হিমন্ত বিশ্ব শৰ্মালৈ একোখনকৈ বিভিন্ন দাবী সম্বলিত স্মাৰক পত্ৰ প্ৰেৰণ কৰে ।ইফালে ধৰ্মঘটস্থলীত সংগঠনটোৰ কেন্দ্ৰীয় সভাপতি বিমল বৰ্মন আৰু কেন্দ্ৰীয় সাধাৰণ সম্পাদক বিশ্বজিৎ ৰায়ে সাংবাদিকৰ আগত প্ৰকাশ কৰে যে বিজেপি নেতৃত্বাধীন কেন্দ্ৰীয় আৰু ৰাজ্য চৰকাৰখনে কোঁচ ৰাজবংশী জনগোষ্ঠীৰটোৰ পৰা বিভিন্ন চলাহি কথাৰে এসময়ত ভোট আদায় কৰি এতিয়া মূৰ পলকা মাৰিছে।
নেতাদ্বয়ে প্ৰধানমন্ত্ৰী নৰেন্দ্ৰ মোদী আৰু মুখ্যমন্ত্ৰী ডঃ হিমন্ত বিশ্ব শৰ্মা চূড়ান্ত মিছলীয়া বুলি গুৰুতৰ অভিযোগ কৰি জনগোষ্ঠীটোৰ প্ৰতি কোনো গুৰুত্ব নিদিলে অহা এপ্ৰিল মাহৰ পৰাই নতুন দিল্লী আৰু গুৱাহাটীত এলানি গণতান্ত্ৰিক ভাৱে ধৰ্ণা আৰু অসম- পশ্চিম বংগ ৰাজ্য বন্ধৰ দৰে আন্দোলনৰ কাৰ্যসূচী গ্ৰহণ কৰিব বুলি হুংকাৰ দিয়ে।