সৰভোগৰ তিনি গৰাকী মেধাৱী ছাত্ৰ-ছাত্ৰী সৰ্বভাৰতীয় নিটৰ পৰীক্ষাত উজলি উঠিল, দৰিদ্ৰতা শিক্ষাৰ ক্ষেত্ৰত হেঙাৰ হ’ব নোৱাৰে তাকেই প্ৰমাণ কৰিলে ৰাখী পাঠকে…

দৰিদ্ৰতাই যে শিক্ষাৰ ক্ষেত্ৰত কেতিয়াও হেঙাৰ হ’ব নোৱাৰে তাকেই আকৌ এবাৰ প্ৰমাণ কৰি দেখুৱালে সৰভোগৰ পূৱ চকাবাউসীৰ অতি দৰিদ্ৰ পৰিয়ালৰ মেধাৱী ছাত্ৰী ৰাখী পাঠকে। পূৱ চকাবাউসীৰ খেতিয়ক গুনীন পাঠক আৰু চম্পা পাঠকৰ কন্যা ৰাখী পাঠকে সৰ্বভাৰতীয় নিটৰ পৰীক্ষাত অৱতীৰ্ণ হোৱাৰ আগতে দেউতাকৰ উচ্চ ৰক্তচাপ ৰোগত আক্ৰান্ত হৈ দুবাৰকৈ ষ্ট্ৰোক হৈ চিকিৎসাধীন হৈছিল। আনহাতে ৰাখীৰ দেউতাক সম্পূৰ্ণ ভাৱে সুস্থ নোহোৱা সময়তে আকৌ মাকৰ পেটত অস্ত্ৰোপচাৰ কৰিবলগীয়া হয়। ইপিনে পৰিয়ালৰ অভিভাৱক দুগৰাকী বিচনাত পৰি থকাৰ পিছতো অকনো ভাগৰি পৰা নাছিল মেধাৱী ছাত্ৰী ৰাখী পাঠক। ৰাখীয়ে মাক-দেউতাক বিচনাত পৰি থকা সময়তে অৱতীৰ্ণ হল সৰ্বভাৰতীয় নিটৰ পৰীক্ষাত। অৱশেষত দুখীয়া পৰিয়ালৰ জীয়ৰী ৰাখী পাঠকৰ পৰীক্ষাৰ ফলাফলত ৰাখীয়ে সদ্য ঘোষিত সৰ্বভাৰতীয় নিটৰ পৰীক্ষাত ৫৭৩ নম্বৰ লাভ কৰি পৰিয়ালটোৰ লগতে সৰভোগলৈ সুনাম কঢ়িয়াই আনিলে। মেধাৱী ছাত্ৰীজনীৰ এই সফলতাৰ বাবে দেউতাক আৰু মাকৰ লগতে সমগ্ৰ সৰভোগবাসী আজি গৌৰাৱাম্বিত হৈ পৰিছে । ইপিনে ৰাখীয়ে ভৱিষ্যতে এগৰাকী সফল চাৰ্জন হোৱাৰ সপোন মনত পুহি ৰাখিছে।

আনহাতে সৰভোগৰ দুই মেধাৱী ছাত্ৰ মুকুট দাস আৰু দেৱাংগ দাসেও সৰ্বভাৰতীয় নিটৰ পৰীক্ষাত উত্তীর্ণ হৈ সুনাম কঢ়িয়াই আনিছে। ইপিনে সৰভোগৰ দক্ষিণ গণকগাড়ী গাঁৱৰ ভাৰতীয় সেনা বাহিনীৰ জোৱান সুৰেশ দাস আৰু চিত্ৰা দাসৰ পুত্ৰ মুকুট দাসে ৫৬৯ নম্বৰ লাভ কৰি সৰ্বভাৰতীয় নিটৰ পৰীক্ষাত উত্তীৰ্ণ হৈছে। মুকুট দাসে ভৱিষ্যতে এগৰাকী সফল চিকিৎসক হোৱাৰ মন মেলিছে।ইপিনে সৰভোগৰ মেদা গাঁৱৰ দেৱাংগ দাসে ৪৭৫ নম্বৰ লাভ কৰি সৰ্বভাৰতীয় নিটৰ পৰীক্ষাত উত্তীর্ণ হৈছে। আনহাতে অৱসৰ প্ৰাপ্ত শিক্ষক অশ্বিনী কুমাৰ দাসৰ পুত্ৰ দেৱাংগ দাসে অসমীয়া মাধ্যমত পঢ়ি সৰ্বভাৰতীয় নিটৰ পৰীক্ষাত উত্তীৰ্ণ হৈছে৷ ভৱিষ্যতে দেৱাংগই এগৰাকী অৰ্থবেদিক চিকিৎসক হোৱাৰ বাবে মনত আশা ৰাখিছে।ইপিনে মেধাৱী ছাত্ৰ-ছাত্ৰী তিনি জনৰ সাফল্যত সৰভোগৰ বিভিন্ন অনুষ্ঠান প্ৰতিষ্ঠানে আন্তৰিক অভিনন্দন জ্ঞাপন কৰিছে।