১২ ডিচেম্বৰ, ২০২৪ঃ Titabar। তিতাবৰৰ বৃহত্তৰ চুঙী অঞ্চলৰ বিশিষ্ট শিক্ষাবিদ, কবি, নাট্যকাৰ, অভিনেতা গুণীন্দ্ৰ নাথ হাজৰিকাৰ স্মৃতিত তামোলবাৰীত প্ৰতিষ্ঠা কৰা গুণীন্দ্ৰ নাথ হাজৰিকা জাতীয় বিদ্যালয়ৰ ২২ সংখ্যক প্ৰতিষ্ঠা দিৱস সোমবাৰে বৰ্ণাঢ্য কাৰ্যসূচীৰে উদযাপন কৰা হয়।
উল্লেখযোগ্য যে বৃহত্তৰ অঞ্চলটোৰ অসমীয়া মাধ্যমৰ অগ্ৰণী শিক্ষানুষ্ঠানখনৰ প্ৰতিষ্ঠা দিৱস উপলক্ষে পুৱা অধ্যক্ষা
স্বপ্নাজ্যোতি হাজৰিকাই পতাকা উত্তোলন আৰু ধৰ্মপ্ৰাণা নিৰদা হাজৰিকাই প্ৰয়াত গুণীন্দ্ৰ নাথ হাজৰিকাৰ প্ৰতিচ্ছৱিৰ
সন্মুখত বন্তি প্ৰজ্বলন কৰাৰ পিছত বিয়লি সাংস্কৃতিক অনুষ্ঠান উদ্বোধন কৰে অসম জাতীয় বিদ্যালয় শিক্ষা পৰিষদৰ
যোৰহাট জিলাৰ সভাপতি, বিশিষ্ট অভিনেতা, শিক্ষাগুৰু ৰঞ্জিত গোহাঞি বৰুৱাই।
কেইবাগৰাকী শিক্ষাবিদ, সাংবাদিক, শিল্পী, সমাজকৰ্মীয়ে বিশিষ্ট অতিথিৰ উপস্থিতিত
অৱসৰপ্ৰাপ্ত অধ্যক্ষা বন্তিশিখা পাঠকে হাতে লিখা আলোচনী ‘শব্দ’ আৰু প্ৰাচীৰ পত্ৰিকা ‘অনুৰণন’ উন্মোচন
কৰাৰ পিছত ‘শীতৰ এসন্ধ্যা’ শীৰ্ষক অনুষ্ঠানত বিদ্যালয়খনৰ ছাত্ৰ-ছাত্ৰী, শিক্ষক-শিক্ষয়ত্ৰী আৰু মাতৃসকলে পৰিৱেশন
কৰা গীত-নৃত্য, বাদ্য আৰু নাট্যানুষ্ঠানে অগণন দৰ্শকক মুগ্ধ কৰে।