আজি ১৯৭ গৰাকী পৌৰ নিগমৰ প্ৰাৰ্থীৰ ভাগ্য বন্দী হ’ব ইভিএম মেচিনত । আজি গুৱাহাটী পৌৰ নিগমৰ নিৰ্বাচন । পুৱা ৭.৩০ বজাৰ পৰা আৰম্ভ হোৱা ভোটদান প্ৰক্ৰিয়া বিয়লি ৪.৩০ বজাত সমাপ্ত হ’ব । আজি এই নিৰ্বাচনতে গুৱাহাটী পৌৰ নিগমৰ ১৯৭ গৰাকী প্ৰাৰ্থীৰ ভাগ্য নিৰ্ণয় হ’ব ।
মুঠ ৬০ টা ৱাৰ্ডত অনুষ্ঠিত হোৱা নিৰ্বাচনৰ ইতিপূৰ্বে ৬,৭ আৰু ২২ নম্বৰৰ তিনিগৰাকী প্ৰাৰ্থীক বিনাপ্ৰতিদ্বন্দিতাৰে বিজয়ী ঘোষণা কৰা হৈছে ।
যাৰ পৰিপ্ৰেক্ষিতত আজি ৫৭ টা ৱাৰ্ডতহে নিৰ্বাচন অনুষ্ঠিত হৈছে । উল্লেখযোগ্য যে এইবাৰ প্ৰথমবাৰলৈ ইভিএম মেচিন ব্যৱহাৰ হোৱা পৌৰ নিৰ্বাচনত মুঠ ৭৫৭ টা ভোটগ্ৰহণ কেন্দ্ৰৰ ভিতৰত ৮০ টা কেন্দ্ৰত কেৱল মহিলাৰ দ্বাৰা পৰিচালিত কৰা হৈছে ।এইবাৰ গুৱাহাটী পৌৰ নিগমৰ নিৰ্বাচনত ভোটাৰৰ সংখ্যা হৈছে ৭ লাখ ৯৭ হাজাৰ ৮০৭ গৰাকী। ইয়াৰে ৩ লাখ ৯৭ হাজাৰ ১২৮ গৰাকী পুৰুষ আৰু ৪ লাখ ৬৫৪ গৰাকী মহিলা ভোটাৰ । লগতে ২৬ গৰাকী তৃতীয় লিংগৰ ভোটাৰ।
সুদীৰ্ঘ ৯ বছৰৰ পিছত গুৱাহাটীত অনুষ্ঠিত হোৱা পৌৰ নিগমৰ নিৰ্বাচনত পুৱাৰে পৰা ভোটাৰৰ লানি নিচিঙা শাৰী দেখিবলৈ পোৱা গৈছে । ইফালে শাসনধিষ্ঠ বিজেপিৰ প্ৰচাৰ তুংগত আছিল যদিও শেহতীয়াকৈ কংগ্ৰেছৰ শূণ্য স্থিতিৰ সুযোগ গ্ৰহণ কৰি আপৰ সক্ৰিয় ভূমিকাই নিৰ্বাচনৰ প্ৰতিদ্বন্দিতাক অধিক আকৰ্ষণীয় কৰি তোলা দেখা গৈছে ।
বছৰ বছৰ ধৰি গুৱাহাটীবাসীয়ে খোৱা পানীৰ নাটনি, অপৰিষ্কাৰ নলা-নৰ্দমা, কৃত্ৰিম বানপানী, যান-জঁটৰ দৰে জটিল সমস্যাৰ মাজত এক দুৰ্বিসহ জীৱন পাৰ কৰি আহিছে । তেনেক্ষেত্ৰত প্ৰতিদ্বন্দিতা আগবঢ়োৱা প্ৰাৰ্থী সকলেও এইবাৰ নিৰ্বাচনত মূলতে খোৱাপানী সমস্যা দূৰ কৰা প্ৰতিশ্ৰুতিৰে নিৰ্বাচনত অৱতীৰ্ণ হোৱা দেখা গৈছে । ভোটাৰ সকলেও প্ৰাৰ্থীৰ প্ৰতিশ্ৰুতিৰ প্ৰতি সঁহাৰি জনাই সুদীৰ্ঘ ৯ বছৰৰ পিছত হোৱা এই নিৰ্বাচনত পূৰ্ণ সমৰ্থন আগবঢ়োৱা পৰিলক্ষিত হৈছে ।