পশ্চিম কাৰ্বি আংলং, ২ মাৰ্চ: tuliram ronghang । অসমৰ পাহাৰীয়া জিলা তথা দাতিকাষৰীয়া অঞ্চলসমূহৰ দেশৰ বিভিন্ন প্ৰান্তৰ লগত আকাশ যোগাযোগ স্থাপন কৰাৰ উদ্দেশ্যে, কাৰ্বি আংলং স্বায়ত্ব শাসিত পৰিষদৰ চিফ এক্সিকিউটিভ মেম্বাৰ (CEM) ড° তুলিৰাম ৰংহাংৰ নেতৃত্বত নতুন দিল্লীত উদান ভৱনত ভাৰত চৰকাৰৰ কেন্দ্ৰীয় চিভিল এভিয়েশ্বন মন্ত্ৰী ৰামমহন নাইডু কিংজাৰাপুক সাক্ষাৎ কৰা হয়। এই সাক্ষাতৰ সময়ত কাৰ্বি আংলং জিলাত নতুনকৈ গ্ৰীণ ফিল্ড এয়াৰপোৰ্ট নিৰ্মাণৰ উদ্দেশ্যে স্মাৰকপত্ৰ প্ৰদান কৰা হয়।
উল্লেখযোগ্য যে, ২০২১ চনৰ MoU চুক্তি অনুসৰি, কেন্দ্ৰীয় চৰকাৰ, অসম চৰকাৰ আৰু কাৰ্বি আংলংৰ ছয়টা সংগঠনৰ মাজত এক চুক্তি স্বাক্ষৰ হৈছিল। এই প্ৰকল্পৰ নিৰ্মাণ প্ৰক্ৰিয়া বিলম্বিত হোৱাৰ পৰিপ্ৰেক্ষিতত, বুধবাৰে নতুন দিল্লীত কেন্দ্ৰীয় মন্ত্ৰীগৰাকীক সাক্ষাৎ কৰি CEM ড° তুলিৰাম ৰংহাং গ্ৰীণ ফিল্ড এয়াৰপোৰ্ট গঠন প্ৰকল্প অতি সোনকালে আৰম্ভ কৰিবলৈ চৰকাৰৰ পদক্ষেপ গ্ৰহণৰ অনুৰোধ জনায়।
এই সাক্ষাতত CEM ড° তুলিৰাম ৰংহাংৰ সৈতে উপস্থিত আছিল ডিফু লোকসভা সমষ্টিৰ সাংসদ অমৰ সিং টিস্যু, বিধায়ক দৰ সিং ৰংহাং, প্ৰাক্তন সাংসদ ড° জয়ন্ত ৰংপি, প্ৰাক্তন বিধায়ক ড° ধৰম চিং টেৰণ, কাৰ্বি আংলং স্বায়ত্ব শাসিত পৰিষদৰ কাৰ্য্যবাহী সদস্য লুন চিং টেৰণ, সূৰ্য্য ৰংফাৰ, CEM-ৰ উপদেষ্টা এলৱিন টেৰণ, বিশিষ্ট সমাজসেৱক তথা চিকিৎসক ড° জয়ন্তা পাটৰ আদি গণ্যমান্য ব্যক্তি।
বিশেষ সূত্ৰ অনুসৰি, কেন্দ্ৰীয় মন্ত্ৰীগৰাকীয়ে স্মাৰকপত্ৰত উল্লিখিত দাবিসমূহ গুৰুত্বসহকাৰে বিবেচনা কৰিছে বুলি জানিব পৰা গৈছে।