নতুন দিল্লী, ২ এপ্ৰিল: WAQF AMENDMENT BILL । কেন্দ্ৰীয় সংসদীয় পৰিক্ৰমা মন্ত্ৰী কিৰেন ৰিজিজুৱে আজি সংসদত ২০২৫ চনৰ ৱাকফ (সংশোধনী) বিধেয়ক গৃহীত কৰাৰ বাবে আবেদন জনাব। ১৯৯৫ চনৰ ৱাকফ আইন সংশোধন কৰিবলৈ উত্থাপিত এই বিধেয়কটোৰ বিৰুদ্ধে অল ইণ্ডিয়া মুছলিম পাৰ্চনেল ল’ বোৰ্ড (AIMPLB) আৰু বিৰোধী দলসমূহে ইতিমধ্যে তীব্ৰ আপত্তি প্ৰকাশ কৰিছে।
বিধেয়কখন বুধবাৰে সংসদত উত্থাপন হোৱাৰ আগতেই বিজেপি আৰু কংগ্ৰেছে নিজৰ সাংসদসকলক সদনত উপস্থিত থাকিবলৈ হুইপ জাৰি কৰিছে। বিধেয়কখনৰ ওপৰত ৮ ঘণ্টাৰ আলোচনা হোৱাৰ সম্ভাৱনা আছে, আৰু প্রয়োজনে সময় বৃদ্ধি কৰা হ’ব। বিৰোধী দলে বিশেষকৈ সমাজবাদী পাৰ্টি (SP) আৰু ইণ্ডিয়া জোঁটৰ দলসমূহে বিধেয়কখনৰ সমালোচনা কৰি সংসদত ব্যাপক প্ৰতিবাদ সাব্যস্ত কৰাৰ সম্ভাৱনা ব্যক্ত কৰিছে।
২০২৫ চনৰ ৱাকফ (সংশোধনী) বিধেয়কখনৰ মূল উদ্দেশ্য হৈছে ভাৰতত ৱাকফ সম্পত্তিৰ নিয়ন্ত্ৰণ আৰু পৰিচালনা সুদৃঢ় কৰা। এই সংশোধনী আইনৰে ৱাকফৰ সংজ্ঞা পৰিৱৰ্তন, পঞ্জীয়ন প্ৰক্ৰিয়া আধুনিকীকৰণ, তথ্য প্ৰযুক্তিৰ ব্যৱহাৰ বৃদ্ধি আৰু ৱাকফ বোৰ্ডৰ কৰ্তৃত্ব অধিক সুসংগঠিত কৰাৰ লক্ষ্য ৰাখিছে। ১৯৯৫ চনৰ ৱাকফ আইন দীৰ্ঘদিন ধৰি অব্যৱস্থা, দুৰ্নীতি আৰু বেদখলৰ অভিযোগৰ সন্মুখীন হৈ আহিছে, যাৰ পৰিপ্ৰেক্ষিতত এই সংশোধনী বিধেয়ক আনি আইনখনৰ ত্ৰুটিবোৰ দূৰ কৰাৰ চেষ্টা কৰা হৈছে।
ইফালে, কেন্দ্ৰীয় বিত্তমন্ত্ৰী নিৰ্মলা সীতাৰমণে আজি ২০২৪ চনৰ বেংকিং আইন (সংশোধনী) বিধেয়ক ৰাজ্যসভাত গৃহীত কৰাৰ বাবে আবেদন জনাব। এই সংশোধনী বেংকিং খণ্ডৰ নিয়ন্ত্ৰণ আৰু পৰিচালনাৰ ক্ষেত্ৰত গুৰুত্বপূৰ্ণ পৰিবৰ্তন অনাৰ উদ্দেশ্যে কৰা হৈছে।
বৰ্তমান, ৱাকফ (সংশোধনী) বিধেয়ক সম্পৰ্কে চৰকাৰ আৰু বিৰোধী শক্তিসমূহৰ মাজত কোনো সমঝোতাৰ লক্ষণ দেখা নাই। সেয়ে, সংসদত এই বিধেয়কখন গৃহীত হ’ব নে বিতৰ্কিত হৈ পৰিব, সেইটো সম্পূৰ্ণ সংসদৰ মজিয়াত সংখ্যাগৰিষ্ঠতাৰ ওপৰত নিৰ্ভৰ কৰিব।