দিল্লী উচ্চ ন্যায়ালয়ৰ ৰায়। অভিনেতা অনিল কাপুৰক ‘মিষ্টাৰ ইণ্ডিয়া’ বুলি ক’লেই লাগিব জগৰ, ছবিৰ ব্যৱহাৰতো নিষেধাজ্ঞা…

দিল্লী উচ্চ ন্যায়ালয়ে বুধবাৰে অভিনেতা অনিল কাপুৰৰ এখন আবেদনৰ বিষয়ত এক বিশেষ ৰায় দিয়ে৷ আদালতৰ ৰায় অনুসৰি এতিয়াৰে পৰা অনিল কাপুৰৰ অনুমতি নোলোৱাকৈ তেওঁৰ নাম, ফটো আদি ক’তো ব্যৱহাৰ কৰিব নোৱাৰিব৷ বুধবাৰে, দিল্লী উচ্চ ন্যায়ালয়ে অনিল কাপুৰৰ সৈতে সম্পৰ্কিত উপনাম যেনে মিষ্টাৰ ইণ্ডিয়া, এ কে আৰু মজনু ভাইৰ ব্যৱহাৰ নিষিদ্ধ কৰে।অভিনেতাগৰাকীয়ে অলপতে তেওঁৰ ব্যক্তিগত অধিকাৰ সুৰক্ষাৰ বাবে দিল্লী উচ্চ ন্যায়ালয়ত এখন আবেদন দাখিল কৰিছিল। আবেদনখনত, অভিনেতাজনে তেওঁৰ সন্মতি অবিহনে তেওঁৰ নাম, কণ্ঠস্বৰ, ছবি আৰু উপ-নাম ব্যৱহাৰ কৰাৰ বিষয়ত বিভিন্ন সংগঠনৰ বিৰুদ্ধে নিষেধাজ্ঞা বিচাৰিছিল। এতিয়া দিল্লী উচ্চ ন্যায়ালয়ে অভিনেতাজনৰ ব্যক্তিগত অধিকাৰ সুৰক্ষিত কৰিছে আৰু তেওঁৰ সন্মতি অবিহনে তেওঁৰ নাম, ছবি বা কণ্ঠস্বৰৰ ব্যৱহাৰ নিষিদ্ধ কৰিছে। অভিনেতাজনে তেওঁৰ সৈতে সম্পৰ্কিত অশ্লীল ভিডিঅ’ ইণ্টাৰনেটত আপলোড কৰা আন সকলো লিংক অৱৰোধ কৰিবলৈও নিৰ্দেশ জাৰি কৰিবলৈ আদালতত আবেদন জনাইছিল৷

আবেদনৰ শুনানি গ্ৰহণ কৰি ন্যায়াধীশ প্ৰতীবা এম সিঙে কয় যে এজন ব্যক্তিৰ নাম, কণ্ঠস্বৰ, ছবি বা সংলাপ অনুমতি অবিহনে ব্যৱহাৰ কৰিবলৈ দিব নোৱাৰি। লগতে আদালতে কয় যে কৃত্ৰিম বুদ্ধিমত্তা ব্যৱহাৰ কৰি বহুলোকে আনৰ ব্যক্তিগত জীৱনত হস্তক্ষেপ কৰিছে। চেলিব্ৰিটিসকলৰো তেওঁলোকৰ গোপনীয়তা বজাই ৰখাৰ অধিকাৰ আছে। ন্যায়ালয়ে দূৰসংযোগ বিভাগ আৰু কেন্দ্ৰীয় চৰকাৰক অনিল কাপুৰৰ মুখ সংলগ্ন কৰি আপলোড কৰা অশ্লীল ভিডিঅ’ৰ ওপৰতো নিষেধাজ্ঞা আৰোপ কৰি এনে ভিডিঅ’ৰ সকলো লিংক তৎক্ষণাৎ আঁতৰাবলৈ নিৰ্দেশ দিছে।