নাজিৰা: শাসনৰ বাঘজৰী ধৰি ক্ষমতাত অধিষ্ঠিত হোৱাৰ সময়ত বিজেপি দলৰ কাম কৰাৰ সংকল্প প্ৰকাশ আৰু চাৰিটা বছৰ অতিক্ৰম কৰি হাতত মাথো এবছৰ থকাৰ সময়ত ৰাইজৰ ওচৰলৈ পোনৰ হাতত লৈ অহা দেশৰ প্ৰধান মন্ত্ৰীজনৰ লগতে ৰাজ্যখনৰ মুখ্যমন্ত্ৰী জনৰ পত্ৰৰ ৰূপৰেখাই প্ৰতিশ্ৰুতি ৰক্ষা কৰা নাই । একেটি ধাৰাত বাৰ্ত্তা কঢ়িয়াই অনাত পৰিলক্ষিত হোৱা পাৰ্থক্যই হতবাক কৰিছে জনসাধাৰণক এনেদৰেই বিজেপিৰ জনসংযোগ যাত্ৰাক সমালোচনা কৰে বিৰোধ দলপতি দেৱব্ৰত শইকীয়াই এক সংবাদ মেলত । লকডাউনৰ শৃংখলা চৰকাৰে নিজেই ঘোষণা কৰি দলৰ নেতাৰ জড়িয়তে জনসংযোগ অভিযান চলাই ৰাইজৰ কাষ পাব বিচৰা কাৰ্য্যত সামাজিক বা শাৰীৰিক দূৰত্বও নিচেই তৰলভাৱে নস্যাৎ কৰিবলৈ ধৰা এনে কাৰ্য্যই সৰ্বসাধাৰণকো বিপাঙত পেলাই লকডাউনৰ সংজ্ঞাক আকৌ এবাৰ ভাবিবলৈ বাধ্য কৰোৱা বুলি প্ৰকাশ কৰে বিৰোধী দলপতি দেৱব্ৰত শইকীয়াই । ৰাইজক মূল সমস্যাৰ কাষত ৰৈ সমাধন কৰিব বুলি ২০১৬ চনতে ছয়মাহৰ ভিতৰত অসমত এজনো বাংলাদেশী নাথাকিব বুলি দিয়া আশ্বাসবাণীক বিজেপি দলে কোনটো স্তৰলৈ লৈ গ’ল ৰাইজে আজি এই সমস্যাৰ কথাটো নিজে চোৱাৰ প্ৰয়োজন হৈছে বুলি দোহাৰে । অসম চূক্তিৰ আখৰে আখৰে পালন কৰাৰ প্ৰতিশ্ৰুতি ২০১৬ চনত আছিল আৰু শাসনলৈ অহাৰ সময়ত ৰাইজৰ কাষত দিয়া প্ৰতিশ্ৰুতিৰ পাচত ৰাইজে বঞ্চনাৰ মাজেৰেহে “কা” আইনক চকুৰ আগত পৰি ৰোৱাকৈ দেখি থাকি অসম চূক্তিৰ ৫ নং দফা উলংঘন ঘটালে । ৬ নং দফাৰ ৰূপায়নৰ লক্ষ্যত অভিজ্ঞ ব্যক্তিৰ জড়িয়তে সংগঠিত দফা কাৰ্য্যকৰীকৰণৰ পৰামৰ্শৰ প্ৰতিবেদনকে বিজেপি চৰকাৰে গ্ৰহণ নকৰিলে আৰু সুবিধা চাই কথা কোৱা বিজেপি দলৰ স্বৰূপে আচলতে চাৰিটাকৈ বছৰত কি দিলে বুলি জনতাক প্ৰশ্ন কৰি উত্তৰ বিচাৰি ল’বলৈ আহ্বান জনায় দেৱব্ৰত শইকীয়াই । তেনেদৰেই এনআৰচি গ্ৰহণ কৰিবলৈ যোৱাৰ বাটত ৰাইজে ভাবি বিভ্ৰান্ত হোৱাকৈ এতিয়ালৈ এনআৰচি বাতিলৰ পক্ষত হে চৰকাৰ থিয় হৈ ৰৈছে । বান আৰু গড়াখহনীয়াত বিধ্বস্ত হৈ পৰা অসমৰ ৰাইজক দিয়া বানপানী আৰু ব্ৰহ্মপুত্ৰক নিয়ন্ত্ৰণৰ প্ৰতিশ্ৰুতি তথা এঢাপ আগুৱাই গৈ ব্ৰহ্মপুত্ৰৰ খনন আৰু সমান্তৰালকৈ দুয়োপাৰে এক্সপ্ৰেছ হাইৱে নিৰ্মাণৰ প্ৰতিশ্ৰুতি দি চাৰিবছৰে ৰাইজে বৃহৎ বানৰ মাজত থাকি পঞ্চমটো বছৰলৈকে ক’ৰপৰা কলৈ গ’ ল বুলি ৰাইজক নিৰীক্ষণ কৰিবলৈ আহ্বান জনায়.। তেনেদৰে ছয় জনগোষ্ঠীৰ জনজাতিকৰণ কাগজকলৰ পুনৰোজ্জীৱিতকৰণ, ঔষধৰ দাম কমোৱা প্ৰতিশ্ৰুতি, স্মাৰ্ট চিটী, দক্ষতা বিকাশ, ২৪ ঘণ্টাৰ বিদ্যুৎ যোগান, দুৰ্নীতি মূক্ত প্ৰশাসন গঢ়ি তোলা, পৰিৱেশ সংৰক্ষণ, ছিণ্ডিকেট ৰোধ, জলজীৱন আঁচনিত গাঁৱৰ ৰাইজক পাইপযোগে পানী যোগান, শিক্ষা বিভাগৰ সমস্যা ৪৫ দিনত সমাধানৰ লক্ষ্য আদি প্ৰতিশ্ৰুতি কিয় অসাৰ হৈ উঠিল তাৰ উত্তৰ ৰাইজে বিচাৰি চোৱাৰ সময়তে পঞ্চাশ লাখ চিঠি বিতৰণ কৰি এইবাৰ ৰাইজক কোনফালে লৈ যোৱা হ’ব বুলি প্ৰশ্ন কৰে বিধায়ক তথা ৰাজ্যৰ বিধায়িনী দলৰ দলপতি দেৱব্ৰত শইকীয়াই । শেহতীয়াকৈ গৰীৱ কল্যাণ আঁচনিৰ যোগেদি যোগেদি লকডাউনত কৰ্ম সংস্থাপন হেৰুওৱা শ্ৰমিকৰ বাবে ৫০হাজাৰ কোটি টকা ঘোষণা কৰা কেন্দ্ৰীয় চৰকাৰে অসমৰ গৰীৱ তথা শ্ৰমিক ৰাইজক বঞ্চিত কৰিবলৈ অসম চৰকাৰে এৰি দিয়াত দুখ প্ৰকাশ কৰে দেৱব্ৰত শইকীয়াই । তেওঁ লকডাউনত সংস্থাপন হেৰুওৱা অসমৰ শ্ৰমিকক শীঘ্ৰেই ৫০ হাজাৰ কোটিৰ কেন্দ্ৰীয় চৰকাৰৰ গৰীৱ কল্যাণ যোজনাত অন্তৰ্ভূক্ত কৰিবলৈ মুখ্যমন্ত্ৰী সৰ্বানন্দ সোণোৱাললৈ আহ্বান জনায় । দুদিন পূৰ্বে নাজিৰাত জনসংযোগ যাত্ৰাত নাজিৰাত আহি উপস্থিত হোৱা প্ৰাক্তন ৰেল মন্ত্ৰী ৰাজেন গোহাঁইক অসমৰ ৰাইজৰ স্বাৰ্থত গ্ৰহণ কৰিবলৈ আহ্বান জনোৱা কোনোটো আঁচনিয়েই গ্ৰহণ কৰি দেখুওৱাত বিফল নেতা বুলি অভিহিত কৰে ।
