কেন্দ্ৰীয় আয়ুষ তথা বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে আন্তৰ্জাতিক যোগ দিৱসৰ ১০০ দিনৰ গণনাৰ বাবে নতুন দিল্লীত ইতিমধ্যে ‘যোগ মহোৎসৱ’ৰ শুভাৰম্ভ কৰে। এই যোগ আন্দোলনত সক্ৰিয় ভূমিকা পালন কৰিবলৈ সৰ্বস্তৰৰ ৰাইজকে সোণোৱালে আহ্বান জনায়। তদুপৰি, কেন্দ্ৰীয় আয়ুষ মন্ত্ৰীগৰাকীয়ে কৰ্মচাৰীসকলৰ সুবিধাৰ বাবে দেশৰ ক’ৰ্পৰেটসমূহক তেওঁলোকৰ কৰ্মক্ষেত্ৰত ‘যোগ কোষ’ স্থাপন কৰিবলৈও আহ্বান জনায়।
যোগশক্তিৰ সন্দৰ্ভত কেন্দ্ৰীয় মন্ত্ৰী সৰ্বানন্দ সোণোৱালে কয়, “যোগ হৈছে ভাৰতৰ প্ৰাচীন ঐতিহ্যময় কলাৰ এক শক্তিশালী উদাহৰণ, যাৰদ্বাৰা আমি আমাৰ মন, শৰীৰ আৰু আত্মাক পৱিত্ৰ কৰি যোগসূত্ৰ স্থাপন কৰিব পাৰোঁ। যোগে আমাক পৱিত্ৰতা, সৰলতা, সহিষ্ণুতা, ইতিবাচকতা আৰু শান্তি প্ৰাপ্ত কৰাত সহায় কৰিব পাৰে, যি আমাৰ শাৰীৰিক স্বাস্থ্য আৰু মানসিক স্বাস্থ্যৰ বাবে অতিকৈ গুৰুত্বপূৰ্ণ। যোগে আজি মানৱজাতিয়ে সন্মুখীন হোৱা বিভিন্ন সমস্যাৰ সমাধানৰ পথো প্ৰশস্ত কৰিছে। যোগ হৈছে এক বিজ্ঞান। ই মানুহক আৰোগ্য কৰিব পাৰে আৰু এখন সুন্দৰ সমাজ গঢ়ি তুলিব পাৰে।”
অনুষ্ঠানত ভাষণ প্ৰদান কৰি কেন্দ্ৰীয় মন্ত্ৰী সৰ্বানন্দ সোণোৱালে লগতে কয়, “যোগৰ ব্যাপক গ্ৰহণযোগ্যতাই ভাৰতৰ লগতে সমগ্ৰ বিশ্বতে সুস্থ-সবল জীৱনশৈলীৰ সন্ধান দিছে। মাননীয় প্ৰধানমন্ত্ৰী শ্ৰী নৰেন্দ্ৰ মোদী ডাঙৰীয়াৰ গতিশীল নেতৃত্বত ভাৰতে বহনক্ষম আৰু সামগ্ৰিক বিকাশৰ প্ৰসাৰৰ দিশত সচেতন প্ৰচেষ্টা চলাই আছে। ভাৰতে এই বছৰৰ বাবে সন্মানীয় জি-২০ৰ সভাপতিত্ব কৰাৰো সুযোগ পাইছে।
ভাৰতে ‘বসুধৈৱ কুটুম্বকম্’ৰ মূল বিশ্বাসক সাৰোগত কৰি মানৱ সমাজৰ কল্যাণৰ হকে সুফলদায়ক চিন্তা-চৰ্চা আৰু সময়োচিত পদক্ষেপ গ্ৰহণ কৰিছে। ভাৰতৰ সমৃদ্ধ ঐতিহ্য আৰু প্ৰাচীন সভ্যতাৰ এক অনন্য নিদৰ্শন যোগে এই ক্ষেত্ৰত এক গুৰুত্বপূৰ্ণ ভূমিকা পালন কৰিছে। এই বছৰো কেন্দ্ৰীয় বিভিন্ন মন্ত্ৰালয়, ৰাজ্য চৰকাৰ আৰু বিভিন্ন যোগ সংস্থাৰ সহযোগত উলহ-মালহেৰে যোগ দিৱস উদযাপন কৰা হ’ব। ২০১৪ চনৰ পৰা মাননীয় প্ৰধানমন্ত্ৰী শ্ৰী নৰেন্দ্ৰ মোদী ডাঙৰীয়াৰ শক্তিশালী নেতৃত্বত ভাৰতে যোগ আৰু অন্যান্য পৰম্পৰাগত ঔষধৰ বাবে শক্তিশালী পৰিৱেশ গঢ় দিছে। আজি আমি এনে এক পৰ্যায়ত উপনীত হৈছোঁহি য’ত স্বাস্থ্যকৰ জীৱনশৈলীৰ ক্ষেত্ৰত যোগ এক বিশ্বব্যাপী প্ৰৱণতা আৰু অত্যাৱশ্যকীয় অনুশীলনত পৰিণত হৈছে।”
অনুষ্ঠানত উপস্থিত থকা আন্তঃৰাষ্ট্ৰীয় খ্যাতিসম্পন্ন খেলুৱৈ, অৰ্জুন হিমা দাসে যোগৰ প্ৰসাৰৰ প্ৰতি সমৰ্থন জনাই কয়, “মই বহু বছৰ ধৰি যোগাভ্যাস কৰি আহিছোঁ। দিনটো আৰম্ভ কৰাৰ আগতে প্ৰাণায়াম কৰাটো মোৰ বাবে এটা নিয়মীয়া অভ্যাস, যিয়ে মোক উন্নত খেল প্ৰদৰ্শন কৰাতো সহায় কৰে। যোগে মোৰ মন-প্ৰাণ উজ্জীৱিত কৰি ৰাখে। এখন সুস্থ-সবল ভাৰত গঢ় দিয়াৰ দিশত মই সকলোকে যোগৰ প্ৰচাৰ আৰু জনপ্ৰিয়তা বৃদ্ধি কৰাত আগভাগ ল’বলৈ আহ্বান জনাইছোঁ। আহক আমি সকলোৱে ভাৰতীয় সংস্কৃতিৰ এই আশ্চৰ্যকৰ উপহাৰক বিশ্বব্যাপী সম্প্ৰসাৰিত কৰোঁ আৰু মানৱজাতিৰ কল্যাণৰ হকে একত্ৰিতভাৱে কাম কৰি যাওঁ।”
জনসাধাৰণৰ জীৱনশৈলীত যোগক এক অভিন্ন অংগ হিচাপে পৰিগণিত কৰাবলৈ “ৱাই-ব্ৰেক” এপত এক মিনিটৰ সুফলদায়ক ভিডিঅ’ও মুকলি কৰে কেন্দ্ৰীয় আয়ুষ মন্ত্ৰীগৰাকীয়ে। যোগৰ প্ৰতি অধিক যুৱক-যুৱতীক আকৰ্ষিত কৰাৰ বাবে যোগ সম্পৰ্কীয় বিভিন্ন কাৰ্যক্ৰম আৰু প্ৰতিযোগিতা মাইগভ্ প্লেটফৰ্মত আৰম্ভ কৰাৰ প্ৰস্তাৱ দিয়া হৈছে। তদুপৰি, আন্তৰ্জাতিক যোগ দিৱসৰ কাউণ্টডাউনৰ অংশ হিচাপে এই বছৰ আৰু অনেক কাৰ্যকলাপ অনুষ্ঠিত কৰা হ’ব।
যোগ মহোৎসৱৰ উদ্বোধনী অনুষ্ঠানত কেন্দ্ৰীয় মন্ত্ৰী সৰ্বানন্দ সোণোৱালৰ লগতে উপস্থিত থাকে কেন্দ্ৰীয় সংস্কৃতি, পৰ্যটন আৰু ড’নাৰ মন্ত্ৰী জি কিষাণ ৰেড্ডী; মণিপুৰৰ মুখ্যমন্ত্ৰী এন. বীৰেন সিং; কেন্দ্ৰীয় বৈদেশিক পৰিক্ৰমা আৰু সংস্কৃতি ৰাজ্যিক মন্ত্ৰী মীনাক্ষী লেখি; কেন্দ্ৰীয় আয়ুষ ৰাজ্যিক মন্ত্ৰী ডাঃ মুঞ্জপাৰা মহেন্দ্ৰভাই; আয়ুষ মন্ত্ৰালয়ৰ সচিব বৈদ্য ৰাজেশ কোটেচা আৰু অন্যান্য বিষয়াসকল। অনুষ্ঠানটোত বাংগালুৰুৰ এছব্যাসা বিশ্ববিদ্যালয়ৰ উপাচাৰ্য ড° এইচ আৰ নগেন্দ্ৰ, ৰাজস্থানৰ তেৰাপন্থ সমাজৰ মুনিশ্ৰী কমল কুমাৰ, যোগ বিশেষজ্ঞ, যোগ গুৰু, যোগ অনুশীলনকাৰী প্ৰমুখ্যে গণ্য-মান্য ব্যক্তিসকলেও অংশগ্ৰহণ কৰে।
আয়ুষ মন্ত্ৰালয়ে মোৰাৰজী দেশাই ৰাষ্ট্ৰীয় যোগ প্ৰতিষ্ঠানৰ সহযোগত ১৩ আৰু ১৪ মাৰ্চত নতুন দিল্লীৰ তালকাটোৰা ইণ্ডোৰ ষ্টেডিয়ামত আৰু ১৫ মাৰ্চ তাৰিখে উক্ত প্ৰতিষ্ঠানত যোগ কৰ্মশালাৰ আয়োজন কৰিছে।